Plantun de Prouvènço

Pèr coumpara dos planto d'encò nostre

Crepis foetida subsp. rhoeadifolia & Chrozophora tinctoria

Mourre-pudènt

Crepis foetida subsp. rhoeadifolia

Asteraceae Compositae

Àutri noum : Poutarié-pudènto, Mourre-de-porc.

Nom en français : Crépide à feuilles de pavot .

Descripcioun :
Aquéu mourre-pudènt se destrìo de Crepis foetida subsp. foetida qu'a pas de péu glandulous sus li bratèio de la flour coumpausado, soulamen de péu rede. Peréu èi mai fort dins tóuti si partido e flouris mai tard dins l'an. Li fueio, pennado an d'auriho bèn marcado.

Usanço :
Lou mourre-pudènt emé soun óudour e soun marrit goust èi pas bon à manja en ensalado. Aleva acò, couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : Pancaro entresigna
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Crepis
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun

Liò : Champ - Escoumbre e proche dis oustau - Tepiero seco - Camin
Estànci : Termoumediterran à Mountagnard
Couroulougi : Pancaro entresigna
Ref. sc. : Crepis foetida subsp. rhoeadifolia (M.Bieb.) Celak., 1871

Maurello

Chrozophora tinctoria

Euphorbiaceae

Noms en français : Tournesol des teinturiers, Croton des teinturiers.

Descripcioun :
La maurello es uno Euphorbiaceae que douno d'èr pulèu à l'erbo-di-toro, Heliotropium europaeum, subretout que trachis dins li champ e flouris peréu à la fin de l'estiéu. Li flour masclo e femello soun desseparado. Se recounèis à si fru en boulo, cubert de berrugo e à si péu estela (fotò).

Usanço :
Emé la planto se fasié la tenchuro de viro-soulèu que servié à l'Age-Mejan à l'enluminamen di libre e tambèn pèr acoulouri lou manja. D'efèt chanjo de coulour, passo de blu à rouge, quouro lou mitan es acide (pèr acò se boutié li boursèu dins la pisso). Acò se retrobo dins lou papié Tournesol qu'utiliso la chimìo.